30
XXXXXX
Dies und das auf Halterner Platt
Nu hä t wi all wanners wier Pingsten, un de Wunnemonnat Mai is
dann ook all bolle wier rüm. De Mai, wann de Vüögelkes singt, alls
gröen wett un blaiht, is jao de schöenste van alle twiälf Monnate in’t
Jaohr, wann ook dat Wäer bi us nich ümmer metspiält.
In’t kirklicke Liäben is de Mai de Marienmonnat un daomet de
Tied van de Maiandachten. Jao, de sallt ook vandage no giewen.
Aowwer ick mott to miene Schanne ingestaohn, dat ick vantjaohr
no nich eenmaol eene Maiandacht besocht häbb. Un wann ick
ährlick sien sall, ook all de lesden diärtig o vettig Jaohren nich
mähr. Wat villicht dao dran liggen magg, dat socke Maiandachten
in usse Kirken kuum no anbuoden wett’t. Se, düsse Andachten
mein ick, sind nu maol een bietken ut de Mode kuomen. Villicht
sin ick, sind wi äs Blagen un in usse Jugendtied van usse Öllern een
bietken to faken in de Maiandachten schickt wuorn, so dat et för
usse heele Liäben genoog wass.
In dat kirklicke Liäben hätt sick in de Tüskentied jao so allerhand
ännert. Nich tolest ook de Marienfrümmigkeit. Nu kümp mit äs
eenfacken Kirkenstüerbetahler keen Urdeel üöwer kirklicke o
theologiske Saaken to. Män mi düch, fröher härrn se dat villicht
een bietken üöwerdriewen. Den heelen Monnat Mai, van’n irsten
büs lesden Dagg, wassen fröher Aobend för Aobend in alle Kirken
Maiandachten, meest sogar recht gued besocht. Ook van mi.
Ick will nu nich säggen, dat ick in düsse Andachten ümmer
besünners andächtig wirst wäör. Üm ährlick te sien, ick konn
met dat, wat dao van de Pastöre vörluosen o manksen ook
runnerleiert wuor, meest nich virl anfangen. Wat ick in düsse
langwieligen Andachten aowwer för’t Liäben lärt häbb, dat wassen
all de Marienleeder, we daomaols no in dat olle „Laudate“ stonnen.
Wann dat Üörgel dann harre bruust hätt, dann konn ick ut vulle
Buorst metsingen: „Wunderschön prächtige …“ o „Sag an, wer
ist doch diese …“. So gued, dat ick de meesten Strophen vandage
no utwennig kann.
All düsse schöenen Marienleeder wäören aowwer nich de Grund,
dat wi junge Lüe daomaols in de füftiger un sessdiger Jaohren
aobends eegentlick recht gärn in de Maiandachten gaohn sind. De
Andachten fongen näömlick üm acht Uhr an un gongen so büs
half nieggen. Wat usse Öllern ant Huus aowwer nich so genau
kontrolleern konnen. Äs Blagen un Halfwassenen hä t wi dat
natürlick utnützt. Wann wi dann irst in’n Düstern, so üm tein
Uhr, no Huus hen kammen, dann hä t wi eenfack säggt, Rektor
Quabbendieker härr wier keen Enne dran kriegen konnt.
Dat wass luogen, bi Quabbendieker gong’t näömlick meest
besünners gau a . Män mi düch, dat et vandage no jüst so togaiht.
Wann’t ook kuum no Maiandachten gi , de katholiske Kirke
krigg ümmer no allerhand Saaken in de Schohen schuowen, wo se
manksen wahrlick nicks för kann.
Ut de Verbinnung van Maiandacht un Maiennacht süllt daomaols
bi us in Haltern un irst recht up de Düörper üm us herüm sogar
etlicke Hochtieden un Kinddöpen entstaohn sien. Manksen gong
dat so gau, dat de Kinddöpen all vör de Hochtieden kammen.
Aowwer sowat sall jao vandage ook no vörkuomen, jao an de
Dagesordnung sien.
Mien Vergliek hinkt villicht een bietken, aowwer mi düch dat,
wat för junge Lüe vandage de Diskotheken un Clubs sind, dat
wassen in de füftiger un sessdiger Jaohren de Maiandachten. För
de annern Marienandachten, de Rosenkranzandachten, dräpp dat
irst recht to. De sind jao bekanntlick in’n Oktober, un dann is’t
aobens all düster.Wat för tüskenmensklicke Twecke villicht no een
bietken förderlicker is.
O met o aohne Mai- un Rosenkranzandachten, mich düch
et könn bi us in Haltern rühig wier een paor Hochtieden un
Kinddöpen mähr giewen. Ick wünsk uh daorüm allbineen no
eenen schöenen Wunnemonnat Mai un p.P., prima Pingsten.
Heinz Kallho
