28
Dies und das auf Halterner Platt
Een Buer o Landwärt, well nich stürnt, dat is keen Buer.
Dat sach mien Vader fröher all ümmer. Un dat wass to eene
Tied, äs dat den Buernstand no bestgurd gong. Wennigstens
sowiet usseene äs Laie sick daomet utkennt. Wobie ick forts
togirben mott, dat ick nich de meeste Ahnung van Ackerbau
un Veehtucht häbb.
Män wann de Buerslüe vandage ürwer de leigen Tieden
stürnt, dann mach dat wull siene Berechtigung häbben. De
Landwärde hä t wull ähr Krassen. Ook wann’t in Brüssel
un Berlin no allerhand Subventionspötte gi , wo se sick
rieklick druut bedainen kürnt. Dat ännert owwer nicks dran,
dat vandage een Ho nao’n annern dicht maaken mott. Usse
Buern mürt’t sick wat infallen laoten, wann se in düsse hatten
Tieden ürwerlirben willt.
Wat etlicke ook doot. Se spezialiseert sick. De eene foert bloß
no Schwiene, de annere baut Gemöös o Kapps an, ennigen
sogar Spargel. Wier annern verlecht sick vull un ganz up de
Mirlkproduktion. Un jüst de sind besünners int Gatt knirpen.
Wirl dat näömlick de Mirlkpries ganz deip in’n Keller is.Häbb
ick mi vertellen laoten.
Owwer wat een echten westfäölschken Landmann is, de weet
sick te helpen. He gaiht met de Tied un experimenteert. So
äs de drei Buern ut dat schöene Mönsterland, we nu der Mirlk
met Musick produzeert. Wat villicht nich richtig utdrückt is,
de Mirlk kümp ook vandage ümmer no van de Kaihe. Män de
kloogen Buerslüe surgt daoför, dat dat witte Gold met Musick
in Strömen dör ähre Melkmaschinen ött.
Daoför hä t se extra Musickbeschallungsanlagen in ähre
Kohställe installeert. Un de dudelt van murns büs aobends up
de armen Diers runner. We nu villicht denkt, Kaihe sind so
dämlick äs se utsaiht,de lich falschk.De root- un schwattbunten
Mirlkgirwer hä t ähren eegenen Musickgeschmack. Et is ähr
no lange nich eendohn, met wecke Musick se beschallt wett’t.
Wann een Buer nu up de Idee kümp, eenfack WDR veer in
den Kohstall te ürwerdrirgen, dann is dat nich gurd för de
Mirlkproduktion. Womet klaor is, dat WDR 4 met Helene
Fischer, Silbermond un Semino Rossi villicht för Huusfraun
döch, owwer nich för Kaihe. Van Herbert Grönemeyer gar
nich te küern. Bi em wett forts de Mirlk suer.Owwer ook hatte
Rockmusick kümp de sensiblen Kaihe nich topass. Bi de Toten
Hosen, Ramstein o annere Krachmakers sind se güst wurn.
Wat ick ähr nich äs verdenken kann.
O ih dat nu glöeft o nich, bi dat Experiment in de
mönsterländschkenKohställe ist ruutkurmen,dat ickpersönlick
den sölwigen Musickgeschmack häbb äs de Veerbeener. Ook
bi dat Rindveeh staoht näömlick Mozart un Beethoven ganz
vörn in de Hitparade. Jüst so äs bi mi.
Wann mi eene säggen dai, ick härr ’n Geschmack äs ne
Koh, dann härr ick dat fröher äs Beleidigung upfasst. Siet
dat wirtenschoplicke Experiment in’n Kohstall denk ick dao
anners ürwer. De Kaihe un ick sind – musiktechnischk saihn
– sowat äs Trendsetter.
Heinz Kallho
Glossar:
Landwärd – Landwirt
Veehtucht – Viehzucht
leige Tieden – schlechte Zeiten
ött - ießt
root- un schwattbunt –
rot- und schwarzge eckt (Kühe)
topass kurmen – angenehm sein
güst – trocken (Milchkuh)
Veerbeener – Vierbeiner
Rindveeh - Rindvieh
wirtenschoplick - wissenschaftlich
