37
Dies und das auf Halterner Platt
Eegentlick möch ick jao an düsse Stiär keene Reklame maaken.
Dat ürwerlaot ick leiwer dehen, we wat verkoopen willt. De süllt
äöhre Inserate un Anzeigen betahlen. Dat sächt wennigstens de
Lokallust-Lüe, un de mürt’t et jao wirten.Wirl dat se jao äöhr Geld
met socke Reklame verdaint.
Ick riskeer dat owwer doch äs. De Reklamesprurk, wo ick vandage
drup te küern kurmen möch, is mi nülick spontan wier infallen.
He is eegentlick all urolt. Ick kenn den Sprurk all ut miene
Blagentied: „Haribo macht Kinder froh, und Erwachsene ebenso“
häfft wi fröher all bi de Kinoreklame inne Blagenvörstellung van’t
Römertheaoter metsungen. De Generation van vandage kennt
düssen Werbeslogan villicht ähr met Thomas Gottschalk. De is
daomet faken in’t Werbefernsehn te bekieken. He mümmelt dann
up de Mattschiewe siene Goldbärkes off den bunten Colorado-
Konfekt, un verdaint sick daomet ’ne güllene Nirse. Daobie hätt
he – so äs mi dat düch – ook so all satt un genoog daovan. Van dat
Moos mein ick, nich van de Gummibärkes.
För mi möss he düsse Werbespots eegentlick gar nich maaken. Ick
irt dat söete Gerai ook aohne Reklame recht gärn un faken genoog.
Eegentlick dröff ick dat jao nich. Wirgen all den Sucker un de
Dickmaakers, we dao massenwiese drin sitt’t. Un ook wirgen den
Karies, de usseene ook up siene ollen Dage no kriegen kann.
Owwer de Geist is willig un dat Fleeschk hätt nu maol Schmacht.
Un wann ick dann in’n Supermarkt an dat Regaol met de söeten
Saaken vörbiekurm, zack, dann is’t all wier sowiet, un et lich so äs
van Geisterhand sonTuten in mien Inkoopskürfken.Off ick dat will
off nich. Ant Huus lech ick den Tuten dann irst in’t Schapp ganz
nao ächten, män ook dao hätt he meest keene lange Lirwensduer.
Wobie et mi besünners de Colorado-Mischkung andaon hätt. Dao
is allerhand Gerai in, ook Lakritzen, Konfekt met Cocos-Flocken
un so widder. Üm ährlick te sien, ick könn dat Tüüg pundwiese
in mi rinstoppen. Manksen bruuk ick dat ook äs Nervennahrung.
Ümmer dann, wann ick vull te dohen häbb off vull naodenken mott.
Wat mi ook äs Rentner no passeern kann, mähr äs mi leiw is.
Nülick häbb ick mi in’t Café met eene fröhere Kollegin up ’ne Dasse
Capuccino drurpen. Dat doot wi manks, küert dann vann Gott un
de Welt un van olle Tieden. Se is een propper Wicht, alls wat recht
is, in de besten Jaohren. Wo wat sien mott, dao is bi äöhr ook wat
te saihn. Wann ih verstaoht, wat ick daomet säggen will. Un schick
maaken döet se sick ook ganz gärn, wat ähr bestgurd to Gesicht
staiht.
Un nu kurm ick ook endlicks up de Saake met Haribo: Se harr sick
näömlick ganz wat Extras infallen laoten. Irst wuss ick nich, wat ick
saoch. Üm den Hals (off birter utdrückt, in ähr Dekolletee – dat is
französischk un bedütt so vull äs Utschnitt) harr se an eene Kirde
een half Pund Colorado-Konfekt hangen. Ick häbb irst twee maol
henkieken mosst. Et härr nich vull faihlt un ick härr rinbirten. Nee,
nich wat ih nu wier van mi denkt. Nich in dat Dekolletee, in de
söete Colorado-Mischkung wull ick natürlick bieten. De härr ick
för mien Lirben gärn probeert.
Män usseene weet sick jao to benihrmen. Daorüm häbb ick mi
brav trügge hollen un annerswo henkirken. Et is nich to eenen
Mundraub kurmen. De wäör mi ook villicht nich gurd bekurmen.
Wirl dat dat Konfekt näömlick, up den twedden Blick saihn, gar
nich utWiengummi off Lakritz wass.Nee, et hanneln sick üm eenen
raffineerten Modeschmuck ut Filz. Up alle Fälle unverdaulick.
Wat Fraulüe sick nich alls för Quinten infallen laot’t, üm Indruck
te maaken! Ick kann mi manksen bloß wünnern. Äs affwochten,
womet se sick inne naichste Tied den Utschnitt dekoreert. Villicht
met Schokoladen-Ürwerraschkungs-Eier? Dat pöss doch ganz
gurd inne Tied.
Heinz Kallhoff
