28
Dies und das auf Halterner Platt
So old äs ick all wuordn sin, owwer met Hexen häbb ick büs nu
no nicks te dohen hatt. Ick dach ümmer, Hexen, dat sind unwiese
Fraulüe,we in een Knusperhüüsken wuhrnt un inneWalpurgisnacht
up ähre Bessems üm den Blocksbirg suust. Män nu sin ick drächter
kurmen, dat se ook int richtige Lirben vörkurmt un sogar bi mi int
Huus ähr Unwesen drieft.
Vörrige Dage, äs ick muorns frischk un munter ut mien Berre
stiegen wull, dao ga mi dat upmaol so harre eenen Stich inne
Rüggengirgend, eene Handbreet ürwer’t Gatt, dat et mi ganz
schwatt vör Oogen wuor. Ick satt dao äs een Hööpken Elend up de
Bettkante, krumm äs een Fraogeteeken, un wuss nich hott un nich
harr. Et kamm mi vör äs härr dat wull ’ne halwe Stunne duert, büs
ick ut dat Berre ruut un in miene Klamotten drin wass. Äs ick mi
raseern wull un in den Spaigel keek, dao duch mi dat so, äs wann
ick van de harre Piene up eenen Schlach üm twintig Jaohr öller
wuorn wär.
O schonst ick mi medizinischk nich so gurd utkenn un ook
eegentlick van Huus ut keen Hypochonder sin (mein ick
wennigstens), häbb’ke mi doch forts dacht, dat et sick bi düsse Piene
wull üm eenen Hexenschurt hanneln moss. Daovan harr ick faken
all häört, et sölwst ant eegene Lief owwer no nich belirwt. Manks,
wann Kumpels sowat hä t, dann hätt usseens keen Metleed, mäck
höchstens no Witzkes drürwer.
Mien Huusdokter, well ick forts muorns üm half acht anroopen
häbb, harr ook keen birtken Metleed met mi. He sach, ick söll mi
nich so anstellen un bi em gelirgentlick inne Sprirkstunne kurmen,
doot gaohn dai ick an sowat no nich forts. So häbb ick mi dann nao
miene Garage schlirpt. Ick wuss nich dat Garagentor losstekriegen
un hooge te böern. Et hätt wull tein Minuten duert, büs ick in’t
Auto ächter’t Stüer satt.
Äs ick dann nao annertalf Stunne wochten bi den Dokter anne
Riege kamm, dao sach he mi bloß, ick söll mi üm düsse Jaohrestied
wärmer antrecken, daomet ick mi den Rüggen nich verköhlen dai.
Wann ick Piene härr, eenfack de Tände tesammenbieten un mi nich
so anstellen äs ’ne kleene Blage. Manks kümp mi düssen Dokter vör
äs son Pirdemetzger. Ick moss mi dann no frie maaken un kreeg met
sonne Tein-Zentimeter-Sprütze wat in’t Gatt jacht. Daobie härr ick
den Medizinmann wull anne Strott springen konnt, wann ick mi
män bloß härr bewirgen konnt.
Owwer et hätt holpen! Äs ick wier nao Huus kamm, dao wuor de
Piene all wenniger. Ick häbb mi dann schont, den heelen Dach upt
Kanapee lecht un met dat olle Körnerküssen van usse Omma warm
hollen. Un tatsäcklick, et gong mi van Stunne to Stunne birter.
Villicht wass dat jao ’ne junge Hexe, de mi schurten hätt, we villicht
no nich dat Schaiten ruut un mi nich richtig tro en hätt? Eendoon
o olle o junge Hexe, mi hätt dat för’t Irste langt. Düsse unwiesen
Fraulüe süllt män leiwer up’n Blocksbirg blieben un üm mi eenen
grooten Buogen maaken.
Heinz Kallho
Knusperhüüsken – Knusperhäuschen
Bessems – Besen (Mz.)
Blocksbirg -. Berg im Harz
Rüggengirgend – Rückenpartie
Hööpken – Häu ein
Fraogeteeken – Fragezeichen
o schonst – obwohl
Hexenschurt – Hexenschuss
Metleed – Mitleid
böern – heben
Gatt – Gesäß
Strott – Hals/Gurgel
