30
Stadt-Gutschein | 12. November 2016
Dies und das auf Halterner Platt
Vörrige Dage, up’n vetteinten Februar, kamm ick töfällick in
eenen Bloomenladen. Ick wull mi dao ’n nieen Kaktus för mien
Kürkenfenster koopen. Den Vörrigen harr’ke wull to rieklick gurten,
daorüm is he versurpen. Kakteen äsWöstenplanten kürntWater nich
gurd häbben. Ick häbb nu maol keenen gröenen Dummen, daorüm
hä t Bloomen un Planten bi mi wennig Ürwerlirbensutsichten.
Dat mach nu sien äs dat will, äs’ke in den Bloomenladen kamm,
hongen dao ürwerall bunte Reklameschilder rüm. De söllen drup
upmirksam maaken, dat up’n Vetteinten Valentinsdach is. Wat dat
met düssen Valentinsdach up sick hätt, weet sölwst ick: Alle, we
verleiwt, verlurwt o verhieraotet sind, de süllt an düssen Dach
Bloomen koopen un ähre(n) Leiwste(n) daomet beschenken.
Sotesäggen äs Vörgeschmack up den Moderdach Midde Mai, we jao
ook so een künstlicken Fieerdach is, we de Ladenkassen klingeln lött.
Düsse (Un)Sitten met Valentins- un Moderdach (un Halloween in’t
Hirwst) sind jao irst nao’n lesden Krieg ürwer den grooten Diek ut
Amerika to us kurmen. Se hä t sick owwer – so äs mi dat düch – bi
us ümmer no nich recht dörsett’t. Nich alls, wat ut Amerika kümp, is
gurd.Wann ick dao bloß an Donald Trump denk …
Obschonst ick persönlick in’n Oogenschlach nich verleiwt o
verlurwt un all gar nich verhieraotet sin, häbb’ke mi doch äs daoför
intresseert, wat dat met düssen Valentinsdach un den Hilligen, de
up’n vetteinten Februar sienen Naomensdach eert, eegentlick so up
sick hätt. Ick häbb daorüm ganz ächten ut mien Bökerschapp eene
olle Hilligenlegenne ruutsocht. Dat Book harr’ke all jaohrelang nich
mähr inne Hand hatt. Ick häbb mi ürwer mi sölwst wünnert, dat’ke
mi up miene ölleren Dage upmaol för dat Lirben van de Hilligen
intresseer.
Unner „V“, wu Valentin, häbb’ke dann naokirken un ook allerhand
funnen: De Hillige Valentin, een Märtyrer, hätt vör mähr äs
achteinhunnert Jaohr in’t olle Rom lirwt.Wu un worüm he te Dode
kurmen is, dat is eene erbaulicke, owwer ook grülicke Geschichte.
De möch ick hier nich vertellen, sowat häört wull mähr in’t
Kirkenblättken. Sünt Valentin, so stonn in dat frumme Book, is de
Schutzpatron van de Imker! Dat wass mi nie, owwer usseene hätt
jao ook wennig met Immen te kriegen. Un Hannig irt ick ook nich.
Män nich genooch met Immen, de Hillige Valentin is ook de Patron
van de Verlurwten, un daorüm tostännig för dat Stiften van gurde
Ehen. In de angelsächsischken Länner, also ook in de USA, is et
Bruuk, dat sick junge Frau- un Mannslüe, we sick up’n vetteinten
Februar dat irste Maol saiht, tesammenhäört un –blieft. O dat
ümmer klappt, dat stonn nich in de Hilligenlegenne, dao sin’ke ook
ähr skeptischk. De „Dach van de Verleiwden“, so wass in dat dicke
Book to lirsen, sall ursprünglick gar nicks met Sünt Valentin un
sien Martyrium te dohen häbben. Vull mähr met dat Datum. Up’n
vetteinten Februar, wann de Winter meest vörbie is o siene Kraft
nao un nao verlöss, fäng bi de Vürgelkes de Paorungstied an. De
Diers fangt an te turteln, te schnäbeln un ähre Nester te bauen. Jüst
so – poetischk utdrückt – äs verleiwde junge Menschken dat vandage
no doot.
Nu is mi klaor, van’t Lirsen in eene Hilligenlegenne wett usseene nich
dümmer. Ick kann bloß hurpen, dat alle, we’t angaiht, sick stantepee
up’n Patt maakt un ähre Leiwsten eenen Bloomenstruuk koopt, ook
wann de Vetteinte all vörbie is. Villicht een Dutz roode Rosen o
män bloß een Pöttken met bunte Priemelkes. Hauptsaake, et kümp
van Hirten. So stimuleert wünschke uh alle vull Plasseer bi’t Turteln,
Schnäbeln un Nester baun.
Heinz Kallho
Glossar:
Wöstenplanten - Wüstenp anzen
Dummen - Daumen
verleiwt –verliebt
verlurwt – verlobt
Moderdach – Muttertag
obschonst – obwohl
Oogenschlach – Augenblick
Bökerschapp - Bücherschrank
Hilligenlegenne - Heiligenlegende
Immen – Bienen
Hanich – Honig
Vürgelkes - Vöglein
stantepee – auf der Stelle
stimuleert – stimuliert
Plasseer – Spaß, Vergnügen
