22
Dies und das auf Halterner Platt
Ick weet jao nich, leiwe Lirser, häfft ih uh för dütt nieje Jaohr
tweedusendsesstein groot wat vörnuhrmen? Eegentlick holl ick
persönlick van socke gurden Vörsätte jao nich so vull. Wat sick de Lüe
nich alls för Quinten vörnihrmt! De Eene will wenniger schmöken off
sick dat Nikotin ganz affgewührnen, de Annere will sick mähr üm de
Famillge kümmern. Wier annern willt villicht öfters joggen gaohn off
inne Muckibude. Fraulüe willt ’ne Diät anfangen, üm in’t nieje Jaohr
etlicke Punde lichter te wärn.
Alls an sick lurwenswärte Vörsätte.Män dat Jaohr is faken no keene twee
Wirken old, dao häfft sick bi de meesten van us de gurden Affsichten
all wier in Schall un Rauch uplöst. De Geist is un dat Fleeschk nu maol
schwack. Wahne schwack sogar. Dao sall sick ook tweedusendsesstein
wull nicks dran ännern.Den innern Schwienehund behöllt bi de meesten
van us meest ümmer de Bürwerhand.
Un doch, eene Saake häbb ick mi düttmaol vörnuhrmen: Ick möch
mi näömlick öfters äs wier de Tied nirmen üm in’t Kino te gaohn.
Wirgen de Kultur un wirgen’t Vergnögen. Ümmer bloß aobends vör de
Flimmerkiste sitten un mi ürwer dat miese Programm irgern, nee, dat
mott up de Duer nich sien. Dao könn ick mi doch leiwer äs aff un to
eenen schöenen, intressanten un spannenden Film bekieken. Ook wann
dat vandage nich grad een billig Vergnögen is.Wisse, in’t Fernsehn loopt
ook Spirlfilme genoog. Aowwer de sind meest all öller, nich mähr aktuell
un häfft alle tein Minuten rieklick lange Pausen för Reklame. Un met dat
Kino un de groote Lienwand is dat Fernsehn nu maol nich te verglieken.
Mähr in’t Kino gaohn, dat is bi us in Haltern allerdings lichter sächt
äs daon. Et giff jao all siet Jaohr un Dagg in usse Stadt keen Kino
mähr. Die Tieden, wo’t sogar twee Filmtheaoter gaff, dat fienere Deli-
Theaoter anne Mührlenporte un dat Römertheaoter anne Grawenstiege,
de sind all lange vörbie. So lange, dat sick de meesten Hälterschken
all garnich mähr drup besinnen kürnt. Un doch is’t so wirst, Kino-
Jöppken – Josef Nieborg, de Hälterschke Kinokürnig - harr daomaols
twee Kinos up eenmaol. Un in de gurden Tieden wassen beide meest
ümmer gurd besocht. Jao, saoterdaggs un sunndaggs gafft manks sogar
veer Vörstellungen an eenen Dagg. Wobie ick met „gurde Tieden“ de
füftiger Jaohren van’t lesde Jaohrhunnert mein. Büs dat dat Fernsehn
ümmer mähr upkamm un de Lüe leiwer anthuus bleewen un up’t
Kanapee Frankenfeld, Kulenkampf off Robert Lemke bekeeken.
In miene Blagentied sin ick bolle Sunndagg för Sunndagg in’t Kino
wirst, meest in’t Römertheaoter, in de Nommdaggsvörstellungen met
Filme äs „Dick un Doof“ off met Cowboys un Indianer. Manks ook
socken met Musick un Schlagerstärnkes – „Wenn die Conny mit dem
Peter“. Daomaols gafft in Kinos no Platzanwieserinnen, de us in’t
Düstern met ’ne Daschkenlampe up ussen Platz brengen daien. Et
gaff Parkett, Sperrsitz un Loge. Aowwer wi konnen us met usse paor
Gröschkens Daschkengeld meest bloß dat billige Parkett ganz vörne
vör de groote Lienwand leisten.
Schmöken in’t Kino wass füerpolizeilick verburden, un ook süss
meest alls. Wann eene sick nich dran hollen hätt, dann kammen de
Platzanwieserinnen, Kellers Theo - dat wass de Kalfakter - off Kino-
Jöppken persönlick un reipen emnaodrücklick toOrdnung.Manks wuor
ook een Störenfried an’t Schlawittken packt un ruutschmirten. Bloß dat
Schmusen in’t Düstern, dat konn un wull ook dat Kinopersonal nich
verbaiden. Un so is’t faken genoog passeert, dat verleiwde junge Lüe
van Reklame, Vörfilm,Wirkenschau un Hauptfilm nich vull metkrirgen
häfft. So harre wassen se met sick sölwst beschäftigt.Wann ih verstaoht,
wat ick mein.
Off dat vandage in de modernen, komfortablen Kinopaläste ook no so
passeert? Nu, wo ick drürwer schriew, krieg ick direkt wier Lust drup.
Also nich up de Schmuserie in’t Düstern, nee, up dat Kino an sick. Un
wiel dat et jao bi us in Haltern leider Gotts keent mähr giff, mott ick
wull nao Dülmen off Riäkelkusen föehrn. Dao staiht jao midden inne
Stadt Kinopaläste, so groot, dat’m sick bolle drin verloopen kann, met
fief off sess Säöle. Un in jeden loopt annere Filme, manks wirkenlang.
Ick mott doch äs in’t Internet naokieken, wat nu in’t Kino för aktuelle
Filme loopt. Villicht is jao eene daobie, we mi intresseert. Un Schlange
staohn vör de Aobendkasse mott ick ook nich. Ick bestell dat Ticket
eenfack met mienen Computer „online“. Bloß dat Popcorn, dat mott
ick so äs fröher ook no persönlick affhalen un den heelen Film lang
weggmümmeln.
Heinz Kallhoff
