32
Dies und das auf Halterner Platt
Nülick häbb ick in irgendeene Tiedung – o wass dat in Fernsehn?
– wat ürwer eene Ümfraoge luosen, we van dat bekannte
Allensbach-Meinungsforschungs-Institut maakt wuorn is. De Lüe
van Allensbach wullen näömlick wirten, wu sick de Düütschken
vandage vera scheeden doot. O birter utdrückt, wat se so sächt,
wann se uteene gaoht. Wat bi düsse Ümfraoge ruutkamm, hätt mi
dann doch een kleen birtken wünnert.
Män bloß no vettein Prozent van us sächt korrekt „auf
Wiedersehen“, in Bayern ook wull manks äs „Servus“ o „pfüet di“,
de Schwaben „ade“. Un in Norddüütschland sächt se bi’t Kurmen
un Gaohn egaolwech „Moin“. De annern sächt to sirbenunfüftig
Prozent eenfack „tschüss“, „tschö“ o moderner „ciao“. Besünners
de jüngeren Lüe maakt et sick eenfack un sächt faken „bye“, wat so
vull äs ick weet ut dat Englischke kümp.
Üm ährlick te sien, ick harr büs nu ürwer dütt Problemmilirwedach
no nich naodacht. Owwer inne lesde Tied häbb ick dann doch drup
acht girben, wat ick persönlick dann so bi’t Wechgaohn säch. Un ick
häbb mi tatsäcklick daobie erwischket, dat ick meest ook „tschüss“
un nich „auf Wiedersehen“ säch. Wat, wann’m dat wörtlick nirmen
will, villicht sogar ährlicker is. Usseene is jao bi ennige Lüe, wo’m
alle Dage me te dohen hätt, eegentlick gar nich so scharp drup, ähr
so ielig wier te saihn.
Männ vull leiwer is mi dat in’t Olldachslirben, wann ick Platt küern
kann. Met jedereene kann ick dat jao vandage leider Gotts nich
mähr maaken. Ennigen, ook Hälterschken, verstaoht nich äs mähr
dat mönsterländschke Platt. Owwer wann ick Platt küer, dann säch
ick antlest bit Uteenegaohn dat gurde olle „gurdgaohn“. Un wann
mien Tirgenürwer up Zack is, dann gi he mi drup äs Antwaort
„ook so“, so äs sick dat eegentlick häört. Manksen kümp et owwer
ook wull vör, dat ick eenfack „laot di wat …“ säch. Dat hätt den
Vördeel, dat ick mi daobie nich fastleggen mott. Et bli sotesäggen
inne Schwirwe, wat de annere sick laoten sall.
Eegentlick is met düsse Küerie wull meint „laot di wat gurd gaohn“.
Et gi owwer ook annere, nich ganz so fröndlicke Mürglickkeiten,
wat he sick laoten sall. Dao küert’m owwer birter nich drürwer un
behöllt se för sick.
Ook an düsse Finessen is wier dütlick te mirken, dat usse Platt gar
nich so deftig un gro is,äs dat van de hoognirsigenHoogdüütschken
meest annuormen wett. Nee, up Platt kann ick ook ene Nuancen
utdrücken. Wann ick nu för vandage Schluss maak un mi van uh
vera scheiden do, dann säch ick uh, so äs sick dat häört, besünners
hirtlick „gurdgaohn“. Maakt et gurd, büs naigsten Monnat!
Heinz Kallho
Glossar:
vera scheeden – verabschieden
uteene gaohn – auseinander gehen
egaolwech – immer
milirwedach – mein Lebtag
Olldachslirben – Alltagsleben
gurdgaohn – wörtlich: gut gehen
Tirgenürwer – Gegenüber
up Zack sien – aufmerksam, auf Draht sein
inne Schwirwe – in der Schwebe
hoognirsig - hochnäsig
