Dies und das auf Halterner Platt
Düsse Dage gafft bi mi ant Huus to’t Middachirten wier maol
’n düftigen Pott vull Dörnannergemöös. Anners un een birtken
vörnihrmer utdrückt, ’ne Portion Eintopf. Üm ährlick te sien,
wann’t dat giff, dann sett ick mi no maol so gärn an den Dischk. Ick
vergirt dann alle Diäten un ook de gurden Vörsätte, wenniger un
bewusster te irten. In’t Tirgendeel, ick hau dann rin äs „Max anne
Graupen“.
Nee, et stonnen owwer keene Graupen, et stonn Wurtelgemöös
up den Kürkenplan. Schöen met ’ne Frikadelle daobie, deftig un
kräftig. Et hätt mi wier düftig gurd schmaakt, alls wat recht is. Nao
dat Irten wass ick recht püstig, so harre harr ick tolangt. Owwer dat
mäck nicks, wirl dat Wurteln jao bekanntlick wahne gesund sien
süllt, un daorüm wisse ook dat Wurtelgemöös.
Nu stellt sick mi inTesammenhang met dütt leckereWurtelgemöös
eene Fraoge, we ick hiermet an de leiwen Lirser widdergirben
möch. Bi us ant Huus un ook bi etlicke van miene Bekannten is
dat gurde olle Wurtelgemöös näömlick ook unner den spassigen
Naomen „Polizeifinger“ bekannt. Spassig daorüm, wirl dat ick mi
nu würklick nich vörstellen kann, watt dütt rötlicke Gemöös met de
Finger van usse „Frönde un Hölper“ te dohen häbben sall.
Off häfft usse Polßaibiamten villicht würklick Finger, we utsaiht
äs länglicke Wurteln? Is mi büs nu nich upfallen. Owwer wann
hätt usseene äs ürdentlicken Bürger ook all wat met de Polßai te
kriegen? Ick gaoh (un föehr) de Uniformeerten meest leiwer ut’n
Wech. Up alle Fälle wär et för mi schöen un intressant, wann mi
villicht eene van de Lirser drürwer upkläörn könn, wat dat met den
gediegenen Utdruck „Polizeifinger“ up sick häbben könn.
Wat de Wurteln angaiht, so giff et jao kuum een anner Gemöös
för dat in usse düütschke Spraoke so vull Naomen in Ümloop
sind. Hier in usse Girgend sächt wi jao Wurteln, ennigen ook wull
„Möhren“.Wier woanners küert se van „Karotten“ off „Mohrrüben“.
Dann gifft no Lüe, de sächt „rote Rüben“ off „Rübchen“. „Teltower
Rübchen“ ut de Girgend van Berlin sind manks ook bi us up de
Speisekarten te finnen.
Un all düsse Beteeknungen för een un dat sölwige Gemöös. Et wass
fröher rabattenwiese in jeden Huusgaorden te finnen. Ook bi us ant
Huus. De Wurteln in ussen Gaorden hätt mien Vader in’t Hirwst
utmaakt un dann in eene groote Holtkiste met fuchten, witten Sand
lagert.Dao bleben se dann denWinter ürwer ennigermaoten frischk
un konnen nao un nao upbruukt wärn, büs’t dann in Summerdach
niee Wurteln gaff .
Vandage koopt wi de Wurteln up’t Markt off in’n Supermarkt, wo
se dat heele Jaohr ürwer ümmer frischk te kriegen sind. Manksen
mümmel ick de Wurteln ganz gärn äs roh, so äs Kanins off Pirde
dat doot. Dat sall gurd für de Tände sien. Ook för de Oogen. Nao
dat Karotin, wat in de Wurteln sitt, kann’m wiet kieken. Ennigen
irt’t un kurkt vandage sogar dat Gröen van de Wurteln met, off
maakt Schlaot dao drut. Ook dat sall wahne gesund sien, häbb ick
persönlick owwer no nich probeert.
Un för den Teind süllt Wurteln ook gurd sien. Wirl dat de Huut
bruun daovan wett. We se jeden Dach ätt, de kann sick den Besöek
in’t Solarium un villicht sogar den Sunnenurlaub up Malle sparn.
Een Pund Wurteln is jao allemaol billiger äs dat Super-Spar-Last-
Minute-Sunnerangebott in’t Reisebüro. Nao dat Motto „Bleibe im
Lande und ernähr’ dich von Wurzeln“.
Heinz Kallhoff
40
