Dies und das auf Halterner Platt
Ick weet jao nich, o dat bi annere Lüe ook so is, owwer bi
etlicke van miene Verwandten un Bekannten gaiht üm Ultimo
herüm meest ümmer een groot Stührnen un Lamenteern loss.
Dann näömlick, wann’t Gehaolt, Rente o Pension girben
hätt. Nich dat düsse Menschken froh un dankbaor sind för dat
Geld, wat pünktlick up ähr Konto ankurmen is. Dat is jao nich
sölwstverständlick in düsse Tied. Nee, et wett stührnt un klaacht
ürwer de hoogen Stüern, den Soli un all dat, wat us süss no so
a trocken wett. Wisse, mien Vader hätt fröher ümmer all sächt
„A trecken kürnt nich äs Kanins häbben“. Un daomet harr he
sirker nich unrecht.
Män ick persönlick holl mi in düssen Punkt leiwer an de Bibel.
Dao staiht jao bekanntlick drin schrirben (wo, weet ick nich
mähr so genau), dat wi den Kaiser girben süllt wat „des Kaisers“
is. Un daomet wass wisse nich Franz Beckenbauer mennt. Nich
dat ick gärn Stüern betahlen dai, dat nu würklick nich, owwer
ick versöek, mi mürglickst nich drürwer upterirgen. Ick holl dat
daorüm ook manks för ürwerdrirwen, wann ennige van miene
Kumpels Krokodilsträönen vergaiten willt ürwer dat, wat in
ähre Monnatsa rirknung staiht. We sick ürwer dat uprircht,
wat he sowuso nich ännern kann, de is sölwst schuld, wann
he sick den heelen Dach versaut. So säch ick mi. Miene Nich-
uprirgen-Taktik süht so ut, dat ick mi eenfack keene Gedanken
üm Stüern un socke unerfreulicken Saaken maak. Eenfack nich
dran denken. O äs’m vandage säch, dat Problem verdrängen.
Män dütt Verdrängen kann manks ook dat falschke Middel sien.
Dann näömlick, wann ick mi de Saake so vullstännig ut’n Kopp
schlaon häbb, dat ick vergirt miene Stüererkläörung to rechten
Tied a tegirwen. So is mi dat vantjaohr all wier gaohn. Lesde
Wirke kamm een Breef van’t Finanzamt Marl. Dao stonn dick
drürwer: Letzte Mahnung zur Abgabe der Steuerklärung 2014!
Daobie laggen de Stüer-Brocken all dat heele Jaohr ürwer bi
mi ant Huus up mienen Schriefdischk. Män wat ick nich gärn
do, dat schuuf ick leiwer vör mi hen, van eene Schriefdischksiet
up de annere. Un dat komplizeerte Stüerformular utfüllen, dat
häört nu würklick nich to de Saaken, we ick in miene knappe
Tied äs Pensionär besünners gärn do. Kurt un gurd, Winter,
Fröehjaohr un Summer sind vergaohn, un de Hirwst is ook all
meest vörbie, owwer de Stüererkläörung lich ümmer no dao un
wochtet drup, dat eene se utfüllt. Daobie härr se eegentlick all
büs Oktober bi’t Finanzamt sien mosst.
Eenen Stüerberaoder kann sick usseene bi sien knappet
Inkurmen nich leisten. Un de Stüerberaoders girft sick ook met
so kleene Tallen äs miene irst garnich a . Daorüm sall mi wull
nicks anners ürwer blieben, äs sölwst in den suuren Appel te
bieten. Wann mi in de naichsten Dage keene süht, dann lich
dat dao dran, dat ick ant Huus ürwer miene Stüern bröden
mott. O ’t wat nutzt un ick wennigstens een paor Euros van
Schäuble un siene Hölpershölper bi’t Finanzamt Marl trügge
kriech, et sall mi äs verlangen.Wisse treckt se mi ook no wat äs
Versüümnis-Toschlach a .
Schöen wär’t jao, wann sick usseene met een paor Euros extra
villicht äs to Wiehnachten eene Kleenigkeit extra günnen
könn. Män, so äs ick Schäuble, Walter-Borjans un de annern
Raubritter van’t Finanzamt ankiek, kennt de sick ook in de
Bibel ut un wirt’t haorgenau, wat den Kaiser tostaiht. Un dat
süllt wull miene allerlesden Cents sien …
Heinz Kallho
32
